Kæru vinir og vinkonur, frændur og frænkur, systkini og foreldrar. Gleðileg jól! Ég óska ykkur öllum gleðilegra og blessunarríkra jóla og vona að þið fáið notið þess besta sem boðskapur þeirra býður upp á: Hlýju, kærleika, friðar, vonar og trúar. Sjálf er ég við það að upplifa mín fyrstu jól á erlendri grundu, mín fyrstu jól fjarri fjölskyldu minni, mín fyrstu jól með nýju fólki á nýjum stað. Þrátt fyrir það þá leggjast jólin vel í mig. Ég sakna þess að vera ekki heima, en ég fagna nýrri reynslu og nýjum upplifunum. Ég bjóst við að vera einungis þiggjandi þessi jólin hvað varðar helgihald kirkjunnar en því fer fjarri. Ég mun taka þátt í lestri ritningargreina og bæna við jólamessu kl. 18 í Augustana Lutheran Church á aðfangadagskvöld og svo verð ég undirleikari við messu kl. 23 í Resurrection Lutheran Church sama kvöld (einnig þann 26. des. kl. 10). Það verður því aldeilis nóg að gera. Mér er boðið í 4 jólaboð yfir hátíðarnar svo ekki verður einsemdinni fyrir að fara. Ég get því með sanni sagt að ég hlakka til jólanna!
Guð gefi ykkur öllum gleðileg jól, gott fólk. Og drífið ykkur endilega í kirkju yfir hátíðirnar - það jafnast ekkert á við það á jólum! :)
No comments:
Post a Comment